सद्भाव भड्काउने गतिविधिमा नलाग्न वडाअध्यक्ष श्रेष्ठको अनुरोध
सोल्टी टिभी । तरहरा
छिमेकी जिल्ला धरानको गतिविधि प्रति चिन्ता व्यक्त गर्दै इटहरी उपमहानगरपालिका वडा नं. २० का वडा अध्यक्षले सामाजिक, धार्मिक, जातीय एवम् राजनीतिक सद्भाव कायम राख्नका लागि अनुरोध गरेका छन् । उनले सबै पक्षलाई सामाजिक, धार्मिक र जातीय सद्भाव र एकता कायम राख्नु पर्नेमा जोड दिदै आन्दोलनको नाममा मुलुकलाई अस्तव्यस्त बनाउन नहुने विचार व्यक्त गरेका छन् ।
“अहिलेको परिस्थीतिमा मेरो शब्दको गलत प्रचार नगरिदिन अनुरोध गर्दै…”, इटहरीको हाँसपोसा सामुदायिक वन उपभोक्ता समूह, तरहराको सभाहलमा शनिबार सम्पन्न सुनसरी अन्तर्राष्ट्रिय तेक्वान्दो महासंघ (आईटिएफ) को तेस्रो जिल्ला अधिवेशन तथा खेलाडी सम्मान कार्यक्रममा अध्यक्ष श्रेष्ठले चिन्ता प्रकट गरे, “एकअर्कालाई घोचपेचको नाममा आज एउटाले, भोलि अर्कोले आन्दोलन गर्ने हो भने मुलुक अस्तव्यस्त बनिने छ ।”
कसैको राजनीतिक स्वार्थका लागि सोझासाझा सर्वसाधारण जनतालाई सद्भाव भड्काउने गतिविधिमा संलग्न गराउने काम भए त्यो कसैको पनि हितमा नहुने भन्दै अध्यक्ष श्रेष्ठले कसैले पनि त्यस्ता कुनै पनि पक्षको साथ दिननहुने तर्क गरे ।
खेलकुद क्षेत्रममा लागेका खेलाडी तथा युवाहरु धार्मिक, जातीय र सामाजिक अस्थिरता र अराजकतामा नलाग्न उनको अनुरोध थियो ।
राज्यमा धार्मिक र साँस्कृतिक स्वतन्त्रता भए पनि परिस्थीतिको संवेदनशीलतालाई ध्यान दिएर एकअर्काका आस्थामा चोट पुराउने काम चै गर्न नहुने उनको भनाई थियो ।
वडाले खेलाडीहरुको निम्ति यथोचित सहयोग गर्ने अध्यक्ष श्रेष्ठको प्रतिबद्धता थियो ।
