पर्वत : मिलन फाउण्डेसनद्धारा पर्वतको मोदी गाउँपालिका–५ बाजुङमा रहेको महेन्द्रशिखरी माध्यमिक विद्यालयका ४२ जना विद्यार्थीहरुलाई छात्रावृत्ति वितरण गरिएको छ । ‘नरबहादुर गुरुङ स्मृति अक्षयकोष’ मा रहेको साढे दुई लाख रुपैयाँको ब्याजबाट विद्यार्थीहरुलाई छात्रावृत्ति वितरण गरिएको हो ।
मिलन फाउण्डेसनले शिक्षा, स्वास्थ्य, मनोरञ्जन, कृषि, भौतिक पूर्वाधार लगायतका सामाजिक सेवामा सक्रियताका साथ काम गर्दै आइरहेको छ ।
बाजुङमै जन्मिएर हाल हङकङमा रहँदै आएको दुर्गा घोताने गुरुङ ‘मिलन’ ले मिलन फाउण्डेसन स्थापना गरेका हुन् ।
देश बाहिर रहे पनि देशभित्रका विभिन्न कार्यक्रममा सघाउँदै आएका उनले पर्वत जिल्ला सहित देशका अरु जिल्लामा पनि आर्थिक तथा भौतिक सहयोग गर्दै आइरहेका छन् ।
आफ्नो एकल लगानीमा सामाजिक सेवामा सक्रिय रहँदै आएका उनले आफ्नो कमाईको रकमलाई नै सामाजिक रुपमा खर्चिने गरेका हुन् । सोही अनुसार आफ्नै गाउँको विद्यालयमा विभिन्न सहयोग गरिरहेको साना बालबालिकाहरुको अध्ययनमा सघाउनको लागि अक्षयकोषको स्थापना गरिएको गुरुङले बताए ।
सोमबार विद्यालयमा आयोजना गरिएको छात्रावृत्ति वितरण कार्यक्रममा ‘मिलन ग्रुप अफ नेपाल’ अन्तर्गतको संस्था मिलन फउण्डेसनकी अध्यक्ष तथा समाजसेवी दुर्गा गुरुङकी धर्मपत्नी गंगाकुमारी गुरुङले विद्यार्थीहरुलाई छात्रावृत्ति वितरण गरेकी हुन् । हाल हङकङमा रहँदै आएकी गुरुङ गाउँमा आएको अवसर पारेर विद्यालयले अक्षयकोषका स्थापनाकर्ताकै हातबाट छात्रावृत्ति वितरण गरेको हो ।
सो अवसरमा बोल्दै फउण्डेसनकी अध्यक्ष गुरुङले अक्षयकोषलाई विद्यालयले राम्रो सदुपयोग गरेकोमा धन्यवाद ज्ञापन गर्दै कार्यविधि अनुसार अगाडि बढीरहे आगामी दिनमा पनि थप आर्थिक सहायता उपलब्ध गराउने प्रतिबद्धता जनाएकी छिन् ।
‘देशका विभिन्न जिल्लामा हामीहरुले विभिन्न तरिकाले सेवा गर्दै आइरहेका छौँ । आफ्नै गाउँको विद्यालयमा अक्षयकोष स्थापना गर्दा आर्थिक समस्यामा परेका तथा आफ्नै गाउँका साना भाईबहिनीहरुले शैक्षिक सामग्री जुटाउन समस्या नहोला भनेर सोचिएको थियो । विद्यालयले सोही अनुसार गरिरहेको छ,’ उनले भनिन, ‘यसरी नै कार्यबिधि अनुसार अक्षयकोषलाई अगाडि बढाउँदै लैजानु होला । आगामी दिनमा पनि यो कोषमा वा अन्य कुनै तरिकाले थप सहयोग गरेर यहाँहरुको साथमा रहने प्रतिबद्धता व्यक्त गर्दछु ।’
यस्तै कार्यक्रमा बोल्दै विद्यालयको शिक्षक अभिभावक संघका अध्यक्ष वीर बहादुर किसान र बाजुङ शैक्षिक प्रतिष्ठानका अध्यक्ष मनबहादुर क्षेत्रीले समाजसेवी गुरुङले विद्यार्थीको हितको लागि गरेको सहयोगको प्रसंसा गरे ।
आर्थिक समस्यामा रहँदा शैक्षिक सामग्रीहरु जुटाउन नै समस्या भोगिरहेका बालबालिकाहरुको अध्ययनमा छात्रावृत्तिले सघाएको भन्दै उनीहरुले ‘मिलन ग्रुप अफ नेपाल’ बाट आगामी दिनमा पनि सहकार्यको अपेक्षा गरिएको उनीहरुले बताए ।
विद्यालयका प्रधानाध्यापक याम पौडेलले समाजसेवी गुरुङले जस्तै गाउँका अन्य अभिभावकहरुले विद्यालयलाई सघाएमा बालबालिकाहरुलाई सहज हुने बताए ।
कार्यक्रममा स्थानीय जनप्रतिनिधि, विद्यालय व्यवस्थापन समिति, शिक्षक अभिभावक संघ, शिक्षक, अभिभावक, विद्यार्थी सहित स्थानीयको पनि सहभागिता रहेको थियो ।
विद्यालय व्यवस्थापन समितिका अध्यक्ष तथा वडाध्यक्ष मानबहादुर अधिकारीको अध्यक्षतामा भएको कार्यक्रममा स्वागत शिक्षक शारदा अधिकारी र सञ्चालन शिक्षक कृष्णराज सुवेदीले गरेका थिए । सोही अवसरमा फउण्डेसनकी अध्यक्ष गुरुङलाई विद्यालयको तर्फबाट दोसल्ला ओढाएर सम्मान पनि गरिएको थियो ।
