तरहरा । इन्टरनेसनल डायबेटिज फेडेरेसन र विश्व स्वास्थ्य संगठनले सन् १९९१ देखि (आज १४ नोभेम्बरदेखि) विश्वभर मनाउन थालेको विश्व डायबेटिज दिवसको अवसरमा लायन्स क्लव अफ तरहराले पनि एकदिने निःशुल्क डाइविटिज सम्वन्धी व्लड सुगर परीक्षण कार्यक्रम अहिले तरहरा चोकमा राखिरहेको छ । कार्यक्रम ११ बजेसम्म हुने, क्लबका अध्यक्ष मुक्तिनाथ घिमिरेले बताउनुभएको छ ।
“समाजमा सेवा गर्ने भावका साथ विश्वव्यापी रुपमा बढ्दो मधुमेहको समस्याको न्यूनिकरणका लागि लायन्सले देशभर योगदान पुराईरहेको र तरहरामा पनि मधुमेहका सम्भावित बिरामीहरुलाई स्वास्थ्य जाँचका लागि प्रोत्साहित गरेर आफ्नो स्वास्थ्य अवस्था बुझ्न मद्धत गर्ने उद्देश्यले कार्यक्रम आयोजना गरिएको हो ।”, अध्यक्ष घिमिरेले भन्नुभयो, “समाजमा असिमित सेवा गर्नका लागि आजको कार्यक्रम गरिएको हो ।”
उहाँको अनुसार, आर्थिक अवस्था कमजोर भएकालाई थप सेवा गरिने छ । त्यस्तै क्यान्सर पीडितलाई समेत आर्थिकदेखि आवश्यक सहयोग गरिनेछ ।
घिमिरेले शैक्षिक क्षेत्रमा पनि सहयोग गरिने बताउनुभएको छ ।
विश्वभर लगभग ४२५ करोड भन्दा धेरै मानिसहरु मधुमेहबाट पीडित रहेको, इन्टरनेसनल डायबेटिज फेडेरेसनले जनाएको छ । मधुमेहका बिरामीले आफ्नो स्वास्थ्य र खानपानमा बिशेष ध्यान पुर्याउनु पर्छ ।
रगतमा ग्लुकोजको मात्रा बढी हुँदै गएमा मधुमेह हुन्छ । शरिरको तौल बढ्दै गएमा मानिसमा मधुमेहको खतरा पनि बढ्दै जाने सम्भावना हुन्छ । उच्च रक्तचापको समस्या भएको मानिसलाई मधुमेह हुन सक्छ । मानव शरीरमा कोलस्ट्रोलको मात्रा बढ्दै गएमा पनि मधुमेह हुने संभावना हुन्छ । गर्भवती महिलालाई मधुमेहको समस्या छ भने बच्चामा मधुमेह देखिने खतरा धेरै हुन्छ । मुटु रोगी र ४० वर्ष नाघेका मानिसहरुलाई मधुमेहको समस्या देखा पर्न सक्छ ।
मुख सुख्खा हुनु, बढी तिर्खा लाग्नु, पटक पटक पिसाब हुनु, पिसाबको मात्रा धेरै हुनु, राम्ररी खाना खाए पनि दुब्लाउँदै जानु, रुचि बढ्नु वा भोक धेरै लाग्नु, बराबर घाउ खटिरा आउनु तर निको हुन समय लाग्नु, शरीर खासगरी गुप्ताङ्क चिलाउनु, दृष्टि धमिलो हुनु, हातगोडा झम्झमाउनु मधुमेहको मुख्य लक्षण हुन् । बेलैमा नियन्त्रणमा राख्न सकेमा मधुमेहले शरीरका अति महत्वपूर्ण अङ्ग आँखा, मुटु, मिर्गौला, दिमाग र रगत तथा स्नायुका नसामा असर पुर्याउन नसक्ने चिकित्सकको भनाइ छ ।
