सुकदेब चौधरी । इनरुवा
सदरमुकाम इनरुवामा अगामि मंसिर ४ गते हुने प्रतिनिधि सभा तथा प्रदेश सभा सदस्य निर्वाचनका लागि निर्वाचन अचारसहिता २०७९ बारेमा सुनसरीका संचारकर्मीसंग छलफल गरिएको छ । जिल्ला प्रशसन कार्यालय र निर्वाचन कार्यालयले शुक्रबार निर्वाचन आयोगबाट जारी भएको अचारसहिताको आ–आफ्नो क्षेत्रबाट पालना गर्ने गराउने विषयमा संचारकर्मीसंग अन्तरकृयात्मक छलफल गरिएको हो ।
सरकारले मंसिर ४ गतेको प्रतिनिधि सभा र प्रदेश सभा निर्वाचनको तयारी गरेको र आयोगले त्यसका लागि निर्माण गरेको आचार संहिताको बारेमा संचारकर्मीहरुलाई जानकारी दिन अन्तरकृया र छलफल गरेको जिल्ला निर्वाचन अधिकारी कृष्ण पौडेलले जानकारी दिनुभयो । यो आचार संहिता लागू भएकाले सबैले कार्यान्वयन गर्नुपर्ने र संचारकर्मी तथा सञ्चारमाध्यमहरुले त्यसमा बढी निगरानी गर्नुपर्ने पौडेलले जानकारी दिए ।
कार्यक्रममा जिल्ला निर्वाचन अधिकारी कृष्ण पौडेलले निर्वाचन अचारसहिताको बारेमा जानकारी दिनुहुदै निर्वाचनको पूर्व, निर्वाचनका दिन र निर्वाचन पछि मतगणनासम्ममा पालन गर्नुपर्ने आचारसंहिताका बारेमा अभिमुखिकरण समेत गराउनुभएको थियो ।
छलफल कार्यक्रममा संचारकर्मीहरुले निर्वाचनलाई स्वच्छ निष्पक्ष र धाधलीरहित बनाउनका लागि संचारकर्मीलाई निर्वाद रुपमा समाचार संकलनको बतावरण निर्माण गर्नुपर्ने, संचारकर्मी र संचारमाध्यमले उठाएका सवालमा ध्यान दिई कार्वाही प्रकृया अगाडि बढाउनुपर्ने सुझाव दिएका थिए ।
कार्यक्रममा प्रहरी उपरीक्षक प्रभु प्रसाद कढालले शान्ती सुरक्षाका लागि नेपाल प्रहरीले पूर्ण प्रतिवद्ध भएर काम गर्दै आएको र गर्ने बताउनुभयो ।
नेपाल पत्रकार महासंघका केन्द्रिय सदस्य इकवाल अहमदले अचारसहिताको बारेमा जानकारी दिएर मात्रै नहुने भन्दै कार्यान्वयन गर्नुपर्ने र संचारकर्मीलाई निर्वाचनको सबै प्रकृयामा निर्वाद रुपमा समाचार संकलनको वतावरण निर्माण गर्नुपर्नेमा जोड दिनुभयो ।
त्यसैगरी नेपाल पत्रकार महासंघ प्रदेश १ का पूर्व सदस्य दोय जयकृष्ण यादव र शशी कोईरालाले पत्रकारहरु अचारसहिताको पालना गर्न प्रतिवद्ध रहेको तर सरकारी तवरबाट पनि त्यसको पूर्ण पालना गराउनुपर्ने आवश्यकता औल्याउनुभयो ।
कार्यक्रममा पत्रकार शालीग्राम पाण्डे, सुकदेव चौधरी, अर्जुन सुवेदी, सुनिल चौधरी, कृष्ण बहाव, नविन गड्तौला सहितकाले अचारसहिताको बारेमा जानकारी पाएको बताउदै सबै पक्ष र निकायले आआफ्नो ठाउँबाट कार्यान्वयन गर्नुपर्नेमा जोड दिनुभयो ।
जिल्ला प्रशासन कार्यालय र निर्वाचन कार्यालयले यसअघि दलहरुसँग आचार संहिताको बारेमा छलफल गरेको थियो ।
कार्यक्रममा दिएको जानकारी अनुसार असोज २० गते निर्वाचन अधिकृतको कार्यालय संचालनमा आउने र जिल्लामा मुख्य निर्वाचन अधिकृतको नेतृत्वमा जिल्लास्तरीय आचार संहिता अनुगमन समिति बन्नेछ ।
