इटहरी । २८ औं विश्व आदिवासी जनजाती दिवसको अवसरमा आयोजित एक कार्यक्रममा आदिवासी जनजाती समुदाय अझै पनि सामाजिक, आर्थिक र राजनीतिक रुपमा पूर्णरुपमा सबल हुननसकेकोमा चिन्ता व्यक्त गर्दै राज्यका सबै क्षेत्रमा मूलबासी आदिवासी जनजाती समुदायलाई समान हैसियतमा स्थापित गरिनु पर्ने वक्ताहरुले बताएका छन् ।
“आदिबासी जनजातीको मौलिक भाषा, संस्कृति, सामाजिक भेषभूषा र रहनसहन छ ।”, नेपाल आदिवासी जनजाति महासंघ इटहरी उपमहानगरपालिका समन्वय परिषदले मंगलबार इटहरीमा आयोजना गरेको एउटा कार्यक्रममा प्रमुख अतिथि समेत रहनुभएका प्रदेश नम्बर १ को स्वास्थ्य मन्त्री जयराम यादवले भन्नुभयो, “यसकारण पहिचान जरुरी छ ।”
मन्त्री यादवले आदिवासी जनजातीको राज्यमा समान पहुँच हुनुपर्ने तर, त्यो पूर्णरुपमा हुन नसकेको स्वीकार्नुभयो । प्रदेश सरकारले सबै नागरिकलाई एकै हैसियतमा हेर्ने उहाँको कथन थियो ।
त्यस्तै कार्यक्रममा बोल्ने वक्ताहरुले पनि पहिचानको पक्षमा आवाज उठाएका थिए ।
जातीयता झल्कने पहिरन र गरगहना लगाएर, मौलिक भेषभूषामा बाजागाजा तथा नाचगानसहित संगीतचौकदेखि मुख्य चोक, नगरपालिका गेट हुदै प्रहरी कार्यालय अगाडि र हटियाँ हुदै मुख्य सडकबाट कार्यक्रमस्थलसम्म र्याली गरि दिवस मनाईदाँ मन्त्री यादव समेत र्यालीमा हिडेका थिए ।
समन्वय परिषदका अध्यक्ष चिरहाङ राईको सभापतित्वमा सम्पन्न कार्यक्रममा मन्त्री यादवले प्रदेश १ स्वास्थ्य मन्त्रालयको तर्फबाट परिषर्द, इटहरीलाई एउटा एम्बुलेन्स प्रदान गर्नुभएको थियो । सो कार्यक्रममा मन्त्री यादवले राइलाई एम्बुलेन्सको चाबी हस्तान्तरण गर्नुभयो ।
कार्यक्रममा इटहरी उपमहानगरपालिकाको उपमेयर संगीता चौधरी, नेफिन सुनसरी जिल्ला समिति अध्यक्ष राम कुमार माण्डुपा राई लगायतले मन्तव्य व्यक्त गरेका थिए ।
